سريلانكا .. ١٨ يوم في الجنة (الجزء الثاني)

اليوم الأول: نيجومبو

بلد ساحلية صغيرة ملاصقة لعاصمة سريلانكا كولومبو وهي اللي فيها المطار ..

سواحلها مَش حلوه زي ميريسيا لكن عادةً الناس بيعملوها نقطة انطلاق لباقي مزارات سريلانكا عشان قربها من المطار ..

السبب الأساسي لاختيارنا ليها لأول ليلة هو قربها من المطار فعلاً و عشان نبعد عن زحمه كولومبو ( الي بعد كده اكتشفنا ان مفهومهم للزحمه غير مفهومنا خالص وإن الـ traffic مش فظيع خالص للدرجه دي ..

كمان احنا بداية الـ activities والرحلة الحقيقي حيكون في سيجيريا اللي علي بعد ٤ ساعات من المطار ولا يمكن فعلياً نطلع من المطار عليها  ..

أحب أؤكدد هنا إني بعد الرحلة دي رأيي إن كان الأفضل إني أقضي أول ليلة دي في كولومبو بدل نجومبو  ..

أولاً لأن كولمبو العاصمة مدينة ساحلية برضو  وفيها فنادق كتير علي البحر حلوة، كمان فيها حاجات ممكن تتعمل بالليل و فكرة إن الواحد يضرب عصفورين بحجر إنه نزل في مكان قريب من المطار ونفس الوقت شاف العاصمة الصغيرة الجميلة النضيفة المتطورة وده حيقلل طبعاً من التكلفة لانك حتبات كده ليلة في كولومبو وتكون شفتها بدل ما تضيف ليله تانيه زياده عشان تزورها.

عن اختيار الفندق:

ليا وجهه نظر دايماً ان لو حاروح مكان علي البحر أو مكان مش حاعمل فيه اكتيفتيز أو بمعني أصح حاقضي أغلب الوقت في الفندق يبقي مهم جداً بالنسبالي نضافة الفندق وال View بتاعه .. لأني فعلا حاقعد فيه مش حيكون علي قد النوم وبس .. يعني ممكن أتساهل في فندق حاكون فيه طول النهار برة لكن فندق حاقضي فيه اغلب اليوم يبقي الفندق ده لازم يتذاكر له كويس :

الريفيو ، الموقع ، البحر و ال pool area لازم يكونوا متميزين ..

إخترت الفندق ده تحديداً لسبب بسيط .. الفندق ده الوحيد تقريباً اللي في المنطقة اللي بيطل علي بحر و نهر في نفس الوقت .. ظاهرة طبيعية جميلة ومختلفة .. و فيه بلاد الناس بتسافر لها مخصوص عشان تشوف المنظر ده .. تخيل انك تنزل في اوضة ده الفيو من الشباك بتاعك.

لو حد حابب ينزل في نجومبو ارشح الفندق ده ليه:

Suriya Resort

و تاني بأكد ان الأفضل انك تقضي اول ليلة في العاصمة كولومبو ..

و لو تقدر تطلع من المطار علي سيجيريا مباشره يكون أفضل ( خاصة لو طيارتك حتوصل سريلانكا الصبح بدري ) و تكون مدرك إن الطريق بياخد لسيجيريا من ٣ ل ٤ ساعات ..

اليوم التاني:

البداية الحقيقية للرحلة من اليوم ده .. اتحركنا من نجومبو الي سيجيريا .. سيجيريا و المنطقة المحيطة بيها تمثل القلب الثقافي والتاريخي لسريلانكا ..

سيجيريا فيها المعلم الأهم لسريلانكا .. صخره الأسد أو Sigiriya Rock .. 

دايماW بقول إن في تشابه واختلافات بين البلاد .. و إن كل بلد دايما ليها علي الأقل معلم او مكان واحد بيميزها .. زي بصمة الإنسان كده .. مكان بتاعها هي بس .. بصمة سريلانكا هي Sigiriya Rock .. 

ناس كتير بتكسل للأسف تروح هناك .. و ده خطئ كبير .. ذهابك إلي سريلانكا بدون الذهاب لسيجيريا روك عامل زي انك تروح مصر وما تزورش الاهرامات !!

أو تروح فرنسا و ما تشوفش برج إيفل !!

شواطيء سريلانكا جميله .. أه 

فيها سفاري و أفيال .. أه

بس بلاد كتير فيها أفيال و شواطيء حلوة .. لكن ولا  بلد تانية في العالم فيها سيجيريا روك!

ايه هي سيجيريا روك؟

كان فيه ملك قديم في سريلانكا قتل والده عشان يتولي الحكم، فعشان يقوي شوكته و يأكد سلطانه و قوته ويحمي نفسه بنى قلعة عظيمة و قصر ملكي على قمة صخرة شكلها مميز جداً، و أمر إن الصخرة تتنحت في شكل أسد، و بنى في الحقيقة قصرين .. قصر شتوي في مستوي الأرض وقصر صيفي علي الجبل اللي ارتفاعه ٢٠٠ متر تقريباً! 

الأطلال القديمة اللي في مستوي الأرض جميلة جداً وفي وسط غابة من الأشجار، والمتعة الحقيقية في طلوع ١٢٠٢ سلمة للوصول الي قمه الصخره، بتشوف أطلال القصر القديم و منظر قمه في الجمال للمنطقة كلها لانها تعتبر اعلي جبل في المكان كله .. 

و لأن المنطقة متميزة بحاجات كتير غير سيجيريا روك قضينا فيها تلت ليال كاملة عشان نشوف كل حاجة و نستمتع بكل حاجة ..

المقال التالي حاتكلم فيه اما تروح سيجيريا ممكن تزور إيه كمان معاها عشان تستمتع بالتجربة كاملة وتعيش سيرلانكا مش بس تزورها ..

:Tip of the day 

Every country has a unique monument, has its own signature … this is the most important sight seeing in your tour .. do not miss it